የሕወሃት የጦር አዛዦችና የቅማንት ተወላጅ በጭልጋ በሚገኝ በሰራቫ ወታደራዊ ካምፕ ሚስጥራዊ ስብሰባ አደረጉ

Print Friendly, PDF & Email

ከሕወሃት ጋር ቅርበት ያላቸው አንዳንድ የቅማንት ተወላጅ ነጋዴዎችና የመንግስት ሰራተኞች እንዲሁም የሕወሃት የጦር አዛዦች በሚስጥር መምከራቸው ተሰማ

በአማራ ክልል ከሕወሃት ጋር ቅርበት ያላቸው አንዳንድ የቅማንት ተወላጅ ነጋዴዎችና የመንግስት ሰራተኞች እንዲሁም የሕወሃት የጦር አዛዦች በጭልጋ አቅራቢያ ሰርቫ በተባለ ወታደራዊ ካምፕ ውስጥ በሚስጥር መምከራቸው ተሰማ።

በሕወሃት ወታደራዊ አዛዦች የተመራው ስብሰባ የተካሄደው በሰሜን ጎንደር ሕዝበ ውሳኔ ይካሄድባቸዋል በተባሉ ቀበሌዎች የአማራ ተወላጆችን ነን የሚሉ መብዛታቸው አሳሳቢ እየሆነ መምጣቱን ተከትሎ ነው።

በሌላ በኩል የሕወሃት ካድሬዎች ሕዝበ ውሳኔ በሚካሄድባቸው 12 የሰሜን ጎንደር ቀበሌዎች በመከላከያ ጸጥታ አስከባሪነት ስም የአካባቢውን ሕብረተሰብ ቅማንት ነኝ እንዲል የግድያ ዛቻና ድብደባ እየፈጸሙ መሆናቸው ምንጮች ገልጸዋል።

በጭልጋ አቅራቢያ ሰርባ በተባለው ወታደራዊ ካምፕ ውስጥ በሚስጥር የተካሄደው ምክክር ከሕወሃት ጋር ቅርበት ያላቸው አንዳንድ የቅማንት ተወላጅ ነጋዴዎችና የመንግስት ሰራተኞች እንዲሁም የሕወሃት የጦር አዛዦች የተሳተፉበት መሆኑ ተሰምቷል።

ምክክሩ የተካሄደው ደግሞ በሰሜን ጎንደር ሕዝበ ውሳኔ ይካሄድባቸዋል በተባሉ ቀበሌዎች የአማራ ተወላጆችን ነን የሚሉ መበራከታቸው አሳሳቢ እየሆነ በመምጣቱ ነው።

በውይይቱም በሕዝበ ውሳኔው 12ቱን ቀበሌዎች የቅማንት ማድረግ ካልተቻለ በ3 መንገዶች ውጤቱን ለመቀልበስ በሕወሃት በኩል መታቀዱ ምክክር ተደርጎበታል።

በሕዝበ ውሳኔው አማራ ነን የሚሉ ወገኖች ካመዘኑ ደግሞ አንደኛው መንገድ የምርጫ አስፈጻሚዎችን በመጠቀም ኮሮጆ መገልበጥ ነው። በአካባቢው ግጭት ማስነሳትና የሕዝበ ውሳኔ ሒደቱን ማደናቀፍ 2ኛው መንገድና ሌላኛው አማራጭ ተደርጎ ተቀምጧል።

በ3ኛ ደረጃ እንደ አማራጭ የተያዘው የምርጫ ውጤቱ ሲገለጽ ውጤቱን አንቀበልም ተጭበርብሯል በማለት ሂደቱ እንዲደገም ማድረግ በሕወሃት የመከላከያ አዛዦች የተመራው ይህው ሚስጥራዊ ስብሰባ ምክክር ያደረገበት አጀንዳ ነው።

ሕወሃት ከፌደራል በተወከሉ የመከላከያ አዛዦቹ አማካኝነት በምርጫው ከወዲሁ ጣልቃ ገብቶ ሂደቱን ማወክ መጀመሩን የኢሳት ምንጮች ከስፍራው ጠቁመዋል።

ይህ ሚስጥራዊ ስብሰባ ከሕወሃት ጋር ቅርበት ባላቸው አንዳንድ የቅማንት ተወላጅ ነጋዴዎች፣የመንግስት ሰራተኞችና በሕወሃት የጦር አመራሮች ሲካሄድ የብአዴን ከፍተኛ አመራሮች ደግሞ በባህርዳር የማእከላዊ ኮሚቴ መደበኛ ስብሰባ ለማካሄድ በዝግጅት ላይ ናቸው።
የብአዴን ከፍተኛ አመራሮች ሕዝበ ውሳኔው በምርጫ ቦርድ አማካኝነት በፌደራል በኩል የሚካሄድ ነው በሚል ለጉዳዩ ትኩረት አለመስጠታቸውን የቅርብ ምንጮች ለኢሳት ገልጸዋል።

የሕወሃት ካድሬዎች ግን ሕዝበ ውሳኔ በሚካሄድባቸው 12 የሰሜን ጎንደር ቀበሌዎች በመከላከያ የጸጥታ አስከባሪነት ስም የአካባቢውን ሕብረተሰብ ቅማንት ነኝ በሚል ድምጽ እንዲሰጥ የግድያ ዛቻን ጨምሮ በማስፈራራት ላይ መሆናቸው ተመልክቷል።

ምንጭ፡- (ኢሳት ዜና–መስከረም 3/2010)

 

ልሣነ ዐማራ- Amhara Press   በተመሳሳይ ጉዳይ ዙሪያ የሚከተለውን ዘግቧል።

ጭልጋ አካባቢ በሚገኘው #በሰራቫ ወታደራዊ ካምፕ ውስጥ #የቅማንት ኮሚቴ፣ የመከላከያ አመራሮች እና ከፌደራል የሄዱ ምርጫ አስፈፃሚዎች በሚስጥር ስብሰባ ሌሊት ሙሉ እያደረጉ እንደነበር ታወቀ።

ከተሰብሳቢዎቹ ከፊሎቹ አይከል ከተማ የሚገኘው ቤሩት ሆቴል ያመሹ ሲሆን ከዚያ ተነስተው ነው ወደ ሰራቫ ወታደራዊ ካምፕ የሄዱት ይላሉ የአካባቢው ነዋሪዎች። የጎንደር ዩኒቨርሲቲ እና የአይከል ከተማ መምህራን ተሳትፈውበታል የተባለው ይህ ስብሰባ ዓላማ የደህንነት አካላትን በስፋት አስርጎ በማስገባት በቅማንትና አማራ ህዝብ መካከል ግጭት ለመፍጠር የታለመ ነው ይላሉ ምንጮቻችን።

በምዝገባዉ መሰረት ምርጫዉን ማሸነፍ አንችልም ይልቁንም ሌሎች መንገዶችን መጠቀም አለብን ነገር ግን በምን መንገድ ይሁን በሚለዉ በህወሃት የመከላከያ ደህንነቶችና የቅማንት ኮሚቴን ሲያነታርክ አምሽቷል፡፡
ከዚህ በፊት ከቅማንት ኮሚቴ አፈትልኮ የወጣዉ ዶክመንት ላይ ከመስከረም 7 ቢፈት የህወሃት ደህንነቶችና ከፌዴራል የመጡ አስመራጮችን አንደሚያገኙ በዶክመንቱ ላይ መገለጹ ይታወሳል፡፡

በባለፈዉ ሳምንትም የህወሃት ደህንነቶችና የቅማንት ኮሚቴ አባላት ጎንደር ከተማ ሆቴል ዉስጥ እስከ ሌሊቱ ሰባት ሰአት ተሰብስበዉ ሴራ ሲሸርቡ አምሽተዋል፡፡ እስካሁን የተለያዩ ዘዴዎችን በመጠቀም በተለይም ምዝገባ ላይ ከሌላ ቦታ የመጡ ቅማንቶችን ለመጠቀም ቢሞክሩም በአካባቢዉ ህዝብ እየከሸፈባቸዉ ይገኛል፡፡ ትናንት በጎንደር ብላጅግ ቀበሌ ከ 50 የሚበልጡ አንቸዉ ሚካኤል ከሚባለዉ ላይ አርማጭሆ አካባቢ ተደራጅተዉ ለመመዝገብ ቢመጡም ሳይሳካላቸዉ መመለሳቸዉን መዘገባችን ይታወሳል፡፡

በአማራና በቅማንት ህዝብ ወገን ያሉ በበኩላቸው ምርጫው ሰላማዊ እንዲሆንና የህወሃትን ጣልቃገብነት ለመታገል እየጣሩ መሆኑን ይናገራሉ። በዚህም መሰረት በየቀበሌዉ የሚኖረዉ ማህበረሰብ ካካባቢዉ ዉጪ ለመምረጥ የመጣዉን ህዝብ በትግሰትና በማስረዳት አምባጓሮ ሳይፈጠር ለመመለስ እየሞከሩ ነዉ፡፡

የቅማንት ኮሚቴና የህወሃት ደህንነቶች ህዝብን ለማጫረስ የሚያደርጉትን ሙከራ እንዲያቆሙ አለያም ለሚመጣዉ ነገር ሁሉ ተጠያቂ እንደሚሆኑ ልናሳስብ እንወዳለን፡፡

 
 

 

 

ምንጭ፡ ልሣነ ዐማራ- Amhara Press